24 | 09 | 2011 | 18:16 | ռեպորտաժ

-Այգաբաց գյուղի Ս.Գեւորգ եկեղեցում պատարագ մատուցելուց հետո եկել ենք Գյումրի, մեր այցը պատահական չէ. այսօր Սուրբ Գեւորգի տոնն է, նաեւ անկախության 20 ամյակի տոնախմբությունների տպավորությունների տակ ենք,-բացատրում է Արմավիրի թեմի Սուրբ Նշան հոգեւոր կրթամշակութային կենտրոնի ղեկավար Հասմիկ Մխիթարյանը: Նա Արմավիրի Գայ (Խաթունարխ) գյուղում վերականգնվող եկեղեցու քահանա Տեր Գեւորգի երեցկինն է: 

Նշված կենտրոնի սաների մոտ 50 աշխատանք` ասեղնագործ ու նկարչական գործեր, ներկայացվեցին գյումրեցիների ուշադրությանը: Շիրակի թեմի սոցիալ-կրթական կենտրոնի դահլիճում այսօր պատանի ստեղծագործողները պատմում էին իրենց առաջին աշխատանքների մասին:

20-ամյա Մարիետա Հովհաննիսյանը կենտրոնի սաներից է եղել, իսկ այժմ դասավանդում է: Նրա գործերում գերիշխում է հոգեւոր թեման` խաչն է, հրեշտակներն են, Հիսուս Քրիստոսը: Թեմաները ներկայացված են Մարաշի ասեղնագործությամբ` հայի ներաշխարհն է, հայկական նուռն ու միրգն է: Նա իր առաջին աշխատանքը` «Մատնությունը», արել է 13 տարեկան հասակում:

Ջրառատ գյուղից ներկա է կենտրոնի սան Արմենուհի Ալոյանը: Նա 11 տարեկան է ու մատիտով, յուղաներկերով է աշխատում:

-Ասեղնագործություն, Մարաշի ասեղնագործություն, ուլունքագործություն, հետո ասեղնագործություն «շիֆոն» կոչվող կտորի վրա. սրանք այն հիմնական փուլերն են, որոնք պետք է սովորեն մեր սաները,-ասում է Մ.Հովհաննիսյանը:

Նկարչություն կենտրոնում ուսուցանում է Խ.Աբովյանի անվան պետական մանկավարժական համալսարանի գեղարվեստի ֆակուլտետի կերպարվեստ ու գծագրություն բաժնի 4-րդ կուրսի ուսանող Գուրգեն Կարապետյանը: Նրա համար սիրելի են հայ նկարիչներից Մ.Սարյանի, Մ.Ավետիսյանի գործերը:

-Մինաս Ավետիսյանի որմնանկարները տեսել եմ միայն հեռուստացույցով, լավ կլիներ մոտիկից տեսնեի,-ասում է նա:

Երեխաների բնանկարներում Գայ, Ջրառատ, Մեծամոր, Հայկաշեն գյուղերի պատկերներն են, իսկ դիմանկարներ դեռ չունեն:

-Դեռ չենք հասել այդ փուլին,-բացատրում է ուսուցիչը:

-Գյումրին տարբերվում է ու տարբերվում է իր նիստուկացով, հյուրասիրությամբ, բարբառով, հետաքրքիր մարդկանցով,-խոստովանում են Գյումրիում առաջին անգամ ոտք դրած հյուրերը:

-Այ, ակնկալում ենք հյուրասիրություն, չէինք հրաժարվի,-ասում է Գուրգենը:

-Գյումրիում քահանաների երեցկիններին չենք ճանաչում, նրանք  համարյա դուրս չեն գալիս ու չեն ներկայանում հասարակությանը, իսկ քահանայի ընտանիքի ներկայությունը պիտի լինի ուսուցանելի ու նման տեղերում ընտանիքն հոգեւոր տեսանկյունից ներկայանա,-ասում է Շիրակի թեմի առաջնորդ Միքայել եպիսկոպոս Աջապահյանը` նկատի ունենալով Գայ գյուղի քահանա Տեր Գեւորգին ու նրա ընտանիքին:

Անի Մկրտչյան