2011-ին լրանում է 20-րդ դարի  պետական, քաղաքական եւ ռազմական գործիչ Գարեգին Նժդեհի ծննդյան 125 ամյակը: Այս առիթով  ստեղծված կառավարական հանձնաժողովի կողմից կազմված ծրագրերին համապատասխան` հանրապետության գրեթե բոլոր մարզերում նախատեսվում են միջոցառումներ` նպատակով ևս մեկ անգամ հայոց պայքարի առաջամարտիկներից  մեկի ու  մեծ հայի անցած ուղին և գործը ներկայացնել հասարակությանն ու հատկապես երիտասարդներին:

Հերթական միջոցառումը կազմակերպվել էր ՀՀԿ երիտասարդական թեւի նախաձեռնությամբ  և Հայաստանի հեծանվային մարզաձեւի ասոցիացիայի աջակցությամբ. Գարեգին Նժդեհի ծննդյան 125-ամյակին նվիրված հեծանվային ուխտագնացության աշխարհագրությունն ընգրկում է ՀՀ բոլոր մարզերը, մեկնարկը տրվել է սեպտեմբերի 24-ին`Երեւանում: Մեկ օր անց` սեպտեմբերի 25-ին արշավախմբի չորրորդ կանգառը  մայրաքաղաքից, Էջմիածնից, Աշտարակից ու Ապարանից հետո Գյումրու Գարեգին Նժդեհի անունը կրող հրապարակում էր:  

 
-Սրանով մենք փորձում ենք եւս մեկ անգամ հասարակության ուշադրությունը սևեռել Նժդեհի գործին ու դրա նշանակությանը մեր պատմության մեջ, որովհետեւ նաեւ նրա շնորհիվ է, որ մենք անկախություն ունենք: Նա էլ պայքարում էր մեր ազատության համար, և անկախ կուսակցական պատկանելությունից, կարեւոր է երիտասարդությանը դաստիարակել Նժդեհի գաղափարներով, ինչը, եթե հաջողվի` կնշանակի ունենալ իրապես հայրենասեր սերունդ,- նշեց  ԱԺ պատգամավոր Սուքիաս Ավետիսյանը: 

-Հայաստանի հեծանվային մարզաձեւի ասոցիացիան արշավի ղեկավարումը վերցրեց իր վրա: Ճանապարհը հեշտ չէ, բայց մեզ օգնում է հատկապես անծանոթ մարդկանց ոգեւորությունը: Շատ տպավորիչ է, որ նրանք կանգնեցնում են, մոտենում մեզ, հետաքրքրվում ու բարի ճանապարհ մաղթում:  Սա է մեզ ուժ տալիս,- ասաց հեծանվային մարզաձշեւի ասոցիացիայի նախագահ, արշավի ղեկավար Մարտին Շարվարդյանը:

Հեծանվային արշավախմբում  մարզաձեւի վետերաններն են, միջազգային մրցումների մասնակիցներ  ու  սկսնակ պատանիներ:  23 հեծանվորդներից ամենամեծն 55 տարեկան է ու արշավախմբի ղեկավարը, ամենփոքրը` 13-ամյա  Էդգար Ստեփանյանը: Ասում է` փոքր լինելը չի խանգարում ու վստահությունն էլ դրանից չի պակասում. առաջին անգամ չէ, որ հեծանիվով երկար ճանապարհ է անցնելու, մանավանդ, որ մարզաձեւով զբաղվելու 3 տարիների ընթացքում հասցրել է Հայաստանի չեմպիոն դառնալ ու մի քանի անգամ արտասահմանում լինել: Իսկ այս արշավին մասնակցում է Գարեգին Նժդեհի մասին շատ բան իմանալու և մեծ զորավարին իր հարգանքի տուրքն այդ կերպ մատուցելու համար:

1401 կմ  7 օրվա ընթացքում.  Գյումրուց հետո արշավախմբի հաջորդ կանգառը Սպիտակն է,  հետո Ստեփանավան, Վանաձոր, Դիլիջան ու այսպես մինչև վերջնագիծ. արշավախումբը սեպտեմբերի 30-ին կանգ կառնի  Ղափանում` Խուստուփ լեռան ստորոտին, որտեղ, իր կտակին համաձայն,  վերահուղարկավորված է Գարեգին Նժդեհը.  զորավարի գերեզմանից վերցված հողը արշավախմբի անդամները կտեղափոխեն Նժդեհի թանգարան:

Լիլիթ Թովմասյան